“Qarabağ”ın UEFA Konfrans Liqasının pley-off mərhələsindəki rəqibi “Tvente” Niderland mətbuatında sərt tənqid olunub.

Futbolmedia.az xəbər verir ki, buna komandanın 3-cü təsnifat mərhələsində Slovakiyanın DAK-1904 klubu ilə cavab oyunundakı (3:3) çıxışı səbəb olub.

“Utancverici nəticə ilə pley-offa yüksəldilər”

Bu başlıqla məqalə yayan “De Telegraaf” nəşri yazır ki, Enshededə ilk matçda 6:0 hesabı ilə qalib gələn “Tvente”nin baş məşqçisi Con van den Brom cavab görüşünə eksperimental heyət buraxıb. Niderland təmsilçisi Maks Bruns və Marko Pyatsanın qolları ilə 2:0 önə keçsə də, ikinci hissədə oyunun səviyyəsi kəskin şəkildə aşağı düşüb.

DAK ardıcıl 3 qol vuraraq hesabda önə keçib (qollardan birini bu yay “Qəbələ”dən transfer edilən Prins Ovusu vurub). “Tvente” yalnız uzatma dəqiqələrində rəqib qapıçının səhvindən sonra Pyatsanın qolu ilə məğlubiyyətdən xilas olub – 3:3.

Nəşr komandanın çıxışını “biabırçı” adlandıraraq yazıb: “Tvente”nin oyunu heç nəyə bənzəmirdi”. Baş məşqçi Van den Bromun qarşılaşmaya sanki məşq oyunu kimi yanaşdığı və bunun nəticəsində Niderland üçün UEFA əmsalında vacib xalların itirildiyi vurğulanıb.

“Qarabağ” DAK-dan daha yüksək səviyyəli rəqibdir”

Məqalədə “Qarabağ”ın DAK-dan xeyli güclü rəqib olduğu da xüsusi qeyd edilib:

“Qarabağ” bacarığı məhdud olan DAK-dan daha yüksək səviyyəli rəqibdir”.

Xatırladaq ki, “Tvente” ilə “Qarabağ”arasında ilk oyun avqustun 20-də, Enshededəki “De Qrolsch Veste” stadionunda keçiriləcək. Cavab matçı isə avqustun 27-də Bakıda olacaq.