“Barselona”nın yarımmüdafiəçisi Fermin Lopes komandasının bu mövsüm UEFA Çempionlar Liqasını qazanacağına ümid etdiyini bildirib.

Futbolmedia.az “Barca Universal”-a istinadən xəbər verir ki, ispaniyalı futbolçu, Çempionlar Liqasının çox çətin turnir olduğunu söyləyib:

“Hazırda İspaniya La Liqasında birinci yerdəyik və bu dinamikanı qoruyub saxlamalıyıq. Çempionlar Liqasında da eyni vəziyyətdir. Bu, çox çətin turnirdir və taleyi xırda detallar həll edir. Bir çox komanda qalib gələ bilər, amma ümid edirəm ki, qalib “Barselona” olacaq”.

“Barselona” cari mövsümdə La Liqa çərçivəsində keçirdiyi 29 oyundan sonra topladığı 73 xalla turnir cədvəlinə başçılıq edir. Kataloniya təmsilçisi ən yaxın izləyicisi “Real”ı 4 xal qabaqlayır.

Hans-Diter Flikin rəhbərlik etdiyi komanda Çempionlar Liqasında 1/4 final mərhələsinə yüksəlib və burada “Atletiko” ilə qarşılaşacaq.