“Tottenhem" "Ayntraxt"la Çempionlar Liqası matçından (2:0) sonra UEFA-nın cəzasına reaksiya verib. Məlum olub ki, London klubunun azarkeşlərinin səfər oyunundakı davranışı “irqçi və/və ya ayrı-seçkilik xarakterli” hesab edilib. UEFA “Tottenhem”ə 30 000 avro cərimə tətbiq edib və bir səfər oyunu üçün bilet satışına şərti məhdudiyyət qoyub.

Futbolmedia.az xəbər verir ki, klubun açıqlamasında bildirilir:

“UEFA tərəfindən tətbiq olunan sanksiyalar barədə məlumatlandırıldıq. Bu, Frankfurtdakı son səfər Çempionlar Liqası oyununda kiçik bir qrup şəxsin tamamilə iyrənc davranışı ilə bağlıdır. Klub araşdırmada UEFA ilə tam əməkdaşlıq edib, həmçinin həmin gecə alman polisi və sonradan London polisi ilə birgə işləyib.

Biz təsdiqləyə bilərik ki, “Ayntraxt” azarkeşlərinə qarşı nasist salamlaması göstərən bütün 3 şəxs müəyyənləşdirilib və klubun sanksiya və qadağalar siyasətinə uyğun olaraq ömürlük diskvalifikasiya edilib.

Klub bütün ayrı-seçkilik formalarına qarşı qəti mövqe tutur və buna görə ən sərt tədbirləri görüb. Həmin gecə kiçik bir azlıq tərəfindən göstərilən iyrənc davranış bizim klubun və azarkeşlərin dəyərlərini əks etdirmir”.