“Real”ın yarımmüdafiəçisi Franko Mastantuono ünvanına səslənən tənqidlərə münasibət bildirib.

Argentinalı futbolçu UEFA Çempionlar Liqasının əsas mərhələsinin 7-ci turunda “Monako”ya qarşı keçirilən və 6:1 hesabı ilə başa çatan oyunda fərqlənərək bir qol vurub.

Futbolmedia.az xarici KİV-ə istinadən xəbər verir ki, 18 yaşlı oyunçu daim müqayisələr və sərt fikirlərlə üzləşdiyini etiraf edib:

“Bunu başa düşürəm. Uşaqlıqdan bəri haqqımda çox danışılmasının həm üstünlüyü, həm də mənfi tərəfi olub. Məni bəzən “yeni Messi” adlandırıblar, bəzən isə “Real”ın tarixində ən uğursuz transfer, hətta fəlakət kimi təqdim ediblər. Mən Messi olduğuma inanmıram və heç vaxt da Messi olmayacam. Amma eyni zamanda, “Real”ın tarixində ən pis transfer olduğuma da inanmıram”.

Mastantuono vurğulayıb ki, əsas məqsədi öz üzərində çalışmaqdır:

“Mən yaxşı formada olmaq və özümün ən yaxşı versiyasına çevrilmək üçün əzmlə çalışıram. Aqressiv tənqidlər insanı incidə bilər, amma biz futbol elitasındayıq və burada qaydalar belədir”.

Mastantuononun son oyundakı performansı onun ətrafında yaranan müzakirələri bir qədər də artırıb.