Ukrayna millisinin yarımmüdafiəçisi Oleksandr Zinçenko sosial şəbəkədə PSV-nin hesabını izləmədən çıxarması ilə bağlı səslənən ittihamlara münasibət bildirib.

Bu iddialar futbolçunun “Ayaks”a keçidi barədə yayılan şayiələr fonunda gündəmə gəlib. Daha əvvəl azarkeşlər Zinçenkonun keçmiş klublarından olan PSV-ni artıq izləmədiyini və komanda ilə bağlı bütün paylaşımları sildiyini fərq ediblər.

Futbolmedia.az xəbər verir ki, ukraynalı futbolçu sosial şəbəkə hesabındakı paylaşımında bu fikirləri təkzib edib:

“Mən çoxdan onların hesabını izləmirdim. Köhnə fotoları da xeyli əvvəl silmişəm. Bunun indiki hadisələrlə heç bir əlaqəsi yoxdur – bu, tam cəfəngiyyatdır”.

O, ötən mövsüm “Arsenal”ın heyətində UEFA Çempionlar Liqasında PSV-nin qapısına qol vurduğunu və buna baxmayaraq, sevinmədiyini də xatırladıb. Zinçenkonun sözlərinə görə, o, PSV-yə hələ də böyük hörmət bəsləyir. Futbolçu hazırda icarə əsasında “Nottingem Forest”də forma geyinir.