PSJ "Marsel"i məğlub edərək Fransa Superkubokunu qazanıb.

Futbolmedia.az xəbər verir ki, Fransa Superkuboku uğrunda keçirilən həlledici görüş başa çatıb. Küveytin "Jaber Əl-Əhməd" stadionunda baş tutan qarşılaşmasının əsas vaxtı 2:2 hesabı ilə yekunlaşıb.

Matçda hesabı 13-cü dəqiqədə Paris klubunun hücumçusu Usman Dembele açıb. 76-cı dəqiqədə "Marsel"in oyunçusu Meyson Qrinvud penaltini dəqiq yerinə yetirərək tarazlığı bərpa edib. Oyunun sonlarında gərginlik pik həddə çatıb. 87-ci dəqiqədə PSJ-nin müdafiəçisi Vilyam Paço topu öz qapısına göndərərək rəqibi hesabda irəli çıxarıb. Lakin parislilər təslim olmayıb, 90+5-ci dəqiqədə Qonsalu Ramuş komandasını məğlubiyyətdən xilas edən qola imza atıb.

Qalibi müəyyən etmək üçün keçirilən penaltilər seriyasında daha dəqiq oynayan PSJ 4:1 hesabı ilə qələbə qazanıb. Paris təmsilçisinin qapıçısı Luka Şevalye ardıcıl iki zərbəni qaytararaq qələbənin memarı olub.

Qeyd edək ki, PSJ Superkubok matçına həm çempionatın, həm də Fransa Kubokunun qalibi kimi, "Marsel" isə ötən mövsüm Liqa 1-in ikincisi kimi qatılıb.

Xatırladaq ki, PSJ ardıcıl dördüncü ildir ki, Fransa Superkubokuna sahib çıxır. Klub bu turnirdə sonuncu dəfə 2021-ci ildə "Lill"ə (0:1) məğlub olmuşdu.