AFFA-nın təşkilatçılığı, UEFA-nın dəstəyi ilə Qaxda 12 yaşadək qızlar arasında “Bahar turniri” keçirilib.

Futbolmedia.az xəbər verir ki, Qax Olimpiya İdman Kompleksində təşkil edilən turnirdə 6 komanda mübarizə aparıb. Qum kənd tam orta məktəbi turnirin qalibi olub. II və III yerləri isə müvafiq olaraq, 2 nömrəli məktəb-lisey və Qorağan kənd tam orta məktəbi tutub.

Qum kənd tam orta məktəbin şagirdi Ülkər Yusifova 6 qolla turnirin ən məhsuldar oyunçusu olub. 2 nömrəli məktəb-liseyin şagirdi Sevil Babayeva ən yaxşı oyunçu, Qum kənd tam orta məktəbin şagirdi Sevinc Şahmalıyeva isə turnirin ən yaxşı qapıçısı seçilib. İlk üç yeri tutan komandalar diplom və medallar, qalib komanda isə kubokla mükafatlandırılıb. Mükafatları AFFA-nın Qadın Futbolu Departamentinin rəisi Əminə Həsənova, U-19 (qızlar) milli komandanın baş məşqçisi Həbib Ağayev və U-17 (qızlar) milli komandanın baş məşqçisi Nərgiz Qurbanova təqdim ediblər. İştirakçılar AFFA və UEFA tərəfindən idman geyimi və ləvazimatları ilə təmin olunublar.

Qeyd edək ki, layihənin təşkilində əsas məqsəd gələcəkdə AFFA U-13 Qızlar liqasına və aşağı yaş qrupu üzrə milli komandalara yeni qız futbolçuların cəlb edilməsidir.