"Millinin oyunları ilə əlaqədar fasilə olmuşdu. Həmişə milli fasilədən sonra oynamaq çətin olur. Sevindim ki, futbolçularım tonusdan düşməyib. Bu gün yaxşı mübarizə apardıq".

Futbolmedia.az xəbər verir ki, bu sözləri "Şamaxı"nın baş məşqçisi Ayxan Abbasov Misli Premyer Liqasının 6-cı turunda "Sumqayıt"a 1:0 hesabı ilə qalib gəldikləri oyundan sonra keçirilən mətbuat konfransında deyib.

"Rəqibi tanıyırıq. Bilirdik ki, onlar da qalib gəlmək istəyir. Xallarımız yaxın idi. Çempionatın əvvəlidir. Oyuna yaxşı başladıq. İlk hissədə ikinci qola daha yaxın idik. Futbolçularımın çıxışı məni sevindirdi. Futbolçularımızdan tələblərimiz var. Oyundan-oyuna bunu daha yaxşılaşdırmalıyıq. Xallarımızın üstünə xal gəldi. Evdə, azarkeşlərimiz qarşısında oynayırdıq. Çox sevinirəm ki, onları sevindirdik. Azarkeşlərimizə təşəkkür edirəm. Bundan sonra daha çətin olacaq. Növbəti matçlara hazırlaşmaq lazımdır" - deyə o bildirib.