"Nəyimiz varsa, ortaya qoyduq. Düşünürəm ki, çempionatda çox yaxşı çıxış etdik. Böyük həvəslə oynayan komandayıq. Həmkarlarım və bir çox mütəxəssis bu çempionatdakı performansımıza görə məni təbrik etdilər".

Futbolmedia.az xəbər verir ki, bu sözləri Türkiyə millisinin baş məşqçisi Vinçenzo Montella Avro-2024-ün 1/4 finalında Niderlanda uduzduqları oyundan (1:2) sonra mətbuat konfransında deyib.

İtaliyalı mütəxəssis qeyd edib ki, bu turnirdən sonra rəqiblər onlara fərqli gözlə baxacaqlar: "5-6 gənc futbolçumuz var. Avropa çempionatının ən gənc komandası biz idik. Mən bu komanda ilə qürur duyuram. Möhtəşəm bir ruhla, türk ruhu ilə oynadılar. Uduzmağımıza rəğmən Türk xalqı bizi tanıyır. Bu oyuncular gördükləri sevgini həqiqətən haqq edirlər. Hamısının alnından öpməliyik. Bu çempionatdan sonra Türkiyəyə fərqli gözlə baxacaqlar. Rəqiblər daha böyük hörmətlə yanaşacaqlar".