"Hatayspor"un köməkçi məşqçisi Gökhan Kağıtçıoğlu futbolçusu, Azərbaycan millisinin üzvü Renat Dadaşov haqqında danışıb.

Futbolmedia.az xəbər verir ki, o, "Yeşil Afşin" nəşrinə açıqlamasında forvardın ötən gün "Başakşehir"lə görüşdə penaltini qola çevirə bilməməsinə toxunub:

"Dadaşov bizim penaltiçimizdir. İndiyə qədər bütün penaltiləri qola çevirmişdi. O, çox güvəndiyimiz bir futbolçudur. Futbolda belə şeylər olur. Penaltidən yararlana bilməməsinin son dəqiqələrdəki yorğunluq və təzyiqlə əlaqədar olduğunu düşünürəm".

Xatırladaq ki, ötən gün "Hatayspor" "Başakşehir"ə 0:1 hesabı ilə uduzub.

Qeyd edək ki, Renat bu ilin sentyabr ayının 6-da "Hatayspor"a keçib.