Azərbaycan millisinin hücumçusu Mahir Emrelinin də formasını geyindiyi "Dinamo" (Xorvatiya) bu gün Çempionlar Liqasının 3-cü təsnifat mərhələsinin cavab oyununa çıxıb.

Futbolmedia.az xəbər verir ki, Zaqreb təmsilçisi ilk görüşdə 1:2 hesabı ilə uduzduğu AEK-in (Yunanıstan) qonağı olub. Mahir Emrelinin sona qədər ehtiyatda qaldığı görüşdə 2:2 hesablı bərabərlik qeydə alınıb.

Zaqreb təmsilçisi 90 dəqiqə ərzində 2 top fərqi ilə irəlidə olsa da, üstünlüyünü qoruya bilməyib. AEK 90+2 və 90+10-cu dəqiqədə vurduğu qollarla növbəti mərhələyə yüksəlib.

AEK pley-off-da Belçika “Antverpen”i ilə üz-üzə gələcək. "Dinamo" isə Avropa Liqasının pley-offunda "Sparta"ya (Çexiya) rəqib olub.