Bu gün UEFA Çempionlar Liqasında 1/4 final mərhələsinin ilk 2 oyunu keçiriləcək.

Futbolmedia.az xəbər verir ki, Portuqaliyada "Benfika" İtaliya "İnter"ini, İngiltərədə "Mançester Siti" ALmaniya "Bavariya"sını qəbul edəcək. Hər iki matç Bakı vaxtı ilə saat 23:00-da başlanacaq.

İndiyədək "Benfika" və "İnter" 2004-cü ildə UEFA Kubokunun 1/4 final mərhələsində üz-üzə gəliblər. Həmin vaxt İtaliya təmsilçisi iki oyunun yekununda mərhələ adlayıb - 4:3, 0:0.

"Bavariya" isə "Mançester Siti" önünə yeni baş məşqçi ilə çıxacaq. Milli komandaların oyunları ilə əlaqədar yaranmış fasilə zamanı Yulian Nagelsman istefaya göndərilib və onu Tomas Tuxel əvəzləyib. Tuxelin rəhbərliyi dövründə isə Münhen təmsilçisi Almaniya Kuboku ilə vidalaşmalı olub. "Mançester Siti"yə rəhbərlik edən Pep Qvardiola isə əvvəllər "Bavariya"da da çalışıb.

İki komanda indiyədək 6 dəfə görüşüb. Tərəflər hərəyə 3 dəfə qalib gəlsələr də, topların nisbətində "Bavariya" öndədir - 10:9.

11 aprel
UEFA Çempionlar Liqası
1/4 final, ilk oyunlar

23:00. "Benfika" (Portuqaliya) - "İnter" (İtaliya)
Baş hakim: Maykl Oliver (İngiltərə)
Lissabon, "Eştadiu da Luj" stadionu

23:00. "Mançester Siti" (İngiltərə) - "Bavariya" (Almaniya)
Baş hakim: Hesus Hil Mansano (İspaniya)
Mançester, "Etihad" stadionu

Qeyd edək ki, digər 1/4 final görüşləri aprelin 12-də keçiriləcək. İspaniyada "Real Madrid" İngiltərənin "Çelsi", İtaliyada "Milan" "Napoli"ni qəbul edəcək.