Uruqvay millisinin üzvləri Edinson Kavani və Xose Mariya Ximenez FİFA-nın 6 aya qədər cəzası ilə üzləşə bilər.

Futbolmedia.az xəbər verir ki, bu barədə "RMC Sport" məlumat yayıb.

Uruqvay millisi qrupun son görüşündə Qanaya qalib gəlib (0:2). Lakin komanda top fərqinə görə məhələ adlaya bilməyib. Uruqvaylılar bir qol vursaydılar, qrupdan çıxa bilərdilər. Lakin görüşün lap sonlarında yaşanan epizoddan sonra baş hakim Daniel Zibert Afrika yığmasının qapısına penalti təyin etməyib. Daha sonra Kavani VAR monitoruna, Ximenes isə təsadüfən FİFA nümayəndəsinə zərbə endirib.

FİFA Uruqvay Futbol Federasiyasına hadisələrlə bağlı öz izahatını təqdim etmək üçün 2023-cü il yanvarın 9-dək vaxt verdiyini bildirib. FİFA İntizam Komitəsinin yekun qərarı fevralın sonuna kimi məlum olacaq.

Qeyd olunur ki, FİFA-nın Uruqvay millisini cəzalandırmaq üçün iki variantı var. Təşkilat 12.3-cü bəndi tətbiq edərsə, o zaman futbolçular milli komandanın 10-15 oyunu üçün diskvalifikasiya olunacaq, 12.4-cü bənd tətbiq edilsə, oyunçular nəinki Uruqvay millisində, hətta komandalarının heyətində də 6 ayadək oynaya bilməyəcəklər.

Qeyd edək ki, Kavani "Valensiya"da, Ximenez isə "Atletiko"da oynayır.