"Şamaxı" klubunun futbolçusu Rəhman Hacıyevin Futbolmedia.Az saytına müsahibəsi.

Rəhman bildiyimə görə zədəli olduğun üçün “Zirə” ilə Premyer Liqanın sonuncu turunu buraxacaqsan. Bu doğru məlumatdır?

Düzünü deyim ki, “Qəbələ” və “Sumqayıt”la oyunlara zədəli şəkildə çıxmışdım. Yəni zədəm olsa da, meydana çıxmışdım. Lakin indi ağrılar bir qədər gücləndiyi üçün “Zirə” ilə oyunu buraxmalıolacam. Lakin həmin iki oyunda meydanda komandam üçün əlimdən gələni etmişdim. İndi daban nahiyyəsindən ağrılar olur. İlk günlərdə heç ayağım üstə dura bilmirdim. İndi şükürlərolsun ki, biraz yaxşıyam.

Zədənin vəziyyəti, ağırlığı nə dərəcədədir. Yəni tez sağalan zədədir. Yoxsa?

Elə bir güclü zədə deyil. Yəni çox tez bir zamanda sağalan zədələrdəndir. Sadəcə, bir müddət istirahət etməli, müalicə olunacam. Yəni qorxulu bir şey deyil. Yüngül bir zədədir. Bu da, süni meydançaların fəsadlarıdır.

Transfer xəbərlərin ardı-arda gəlməkdədir. Eşitmişik ki, iki yerli iddialı klub səni razı salmağa çalışır. Yəni birbaşa müqavilə təklif ediblər. Lakin sən dəqiq bir söz deməmisən. Bu belədir?

Çox doğru məlumat almısınız. Bir həftə öncə mənə yaxşı təkliflər gəldi. Ölkə xaricindən təkliflər olmuşdu. Lakin yerli klublardan keçən həftə gəldi. Ancaq mən də, həmin klublara dəqiq bir söz demədim. Əslində mənim ölkə xaricinə getmək fikrim çox qətiləşib. Maksimum imkan dairəsində legioner həyatl yenidən yaşamaq istəyirəm. Bu iki iddialı, avropa yarışlarına vəsiqə qazanan komandadır. Mənim “Neftçi” ilə müqaviləmin də, olduğunu bilirsiniz. Klub rəhbərliyi ilə görüşümüz olacaq. Mən “Neftçi”ni çox sevirəm. Məsləhətləşdikdən sonra, danışıqlardan sonra bir qərar verəcəm.

Ölkə xaricindən aldığın təkliflər hansı ölkəyə aitdir?

Trkiyə 2-ci liqasında çıxış edən iki komandadan təklif almışam. Hal –hazırda da, onlarla müəyyən detallarla bağlı söhbətlərimiz, müzakirələr davam edir. Razılığa gələ bilsək, birini seçib Türkiyə çempionatına yollanacam. Hər şey yaxşı olarsa, inşəallah növbəti mövsüm Türkiyə liqasında çıxış edə bilərəm. Ancaq onu da deyim ki, hələ ki, bu klublara hə deməmişəm. Razılıq verməyə də, tələsmirəm. Çünki daha yaxşı təkliflər gələ bilər. Buna görə, tələsmirəm. Çünki vaxtımız hələ var.

Əli HƏYATİ