"Zirə"nin baş məşqçisi Rəşad Sadıqov Misli Premyer Liqasının 2-ci turu çərçivəsində "İmişli"yə 3:1 hesabı ilə qalib gəldikləri oyun haqda danışıb.

Futbolmedia.az xəbər verir ki, mütəxəssis oyundan sonra keçirilən mətbuat konfransında qələbəni belə şərh edib:

"Olduqca gərgin və maraqlı oyun keçdi. Xüsusən, 2-ci hissədə sürətli oyun getdi. Çoxlu qol epizodları qaçırdıq. Futbolçular sona qədər inandılar, soyuqqanlı davrandılar. Son dəqiqələrdə əsas məsələ arxaya çəkilməmək idi. Belə də oldu. 2:1-dən sonra da hücum haqqında düşündülər. Bunun da nəticəsi olaraq 3-cü qolu vurduq".

O, futbolçusu Qismət Alıyevin artıq 2-ci oyundur ki, ehtiyatda qalmasının səbəbini açıqlayıb: "Bu, bizim mövsüm boyu planlaşdırdığımız bir məqam idi. Keçən mövsüm Qismət öz mövqeyində tək idi və o zədələndiyi halda çətinliklə üzləşirdik. Hazırda əlimizdə 3 cinah müdafiəçisi var və mövsüm boyu bu rotasiyalı şəkildə davam edəcək. Bu gün onun ehtiyatda olması digər oyunçulardan zəif olması anlamına gəlmir. Hazırda da heyətlə bağlı çatışmazlıqlarımız var".

Baş məşqçi yeni transferlər həyata keçirmək üçün işlərin davam etdiyini bildirib: "Seleksiyalarımız davam edir. Danışıq apardığımız futbolçular da var. Mütləq şəkildə heyətimizi genişləndirməliyik. Konkret desək, 5-6 futbolçu ilə danışıqlar aparırıq. Hansı futbolçuların transfer olacağını yaxın zamanda görəcəyik. Transfer edəcəyimiz futbolçuların heç biri yerli çempionatdan deyil".