“Bakı Metropoliteni” “Qarabağ”ın UEFA Çempionlar Liqasının Liqa mərhələsinin 6-cı turunda "Ayaks"a qarşı oyunu ilə əlaqədar iş rejimini dəyişəcək.

Futbolmedia.az xəbər verir ki, bu barədə qurumun mətbuat xidməti məlumat yayıb.

Azərbaycan Futbol Federasiyaları Assosiasiyasının (AFFA) müraciətinə əsasən, “Gənclik” stansiyasına yaxın yerləşən Tofiq Bəhramov adına Respublika stadionunda keçiriləcək matça görə metropolitendə gücləndirilmiş qrafik tətbiq olunaraq iş saatı uzadılacaq.

Metropolitenin əməliyyat planı və qarşılaşmaya azarkeş marağı nəzərə alınmaqla, dekabrın 10-dan 11-nə keçən gecə bütün stansiyalar saat 01:00-a qədər sərnişinlərin girişinə açıq olacaq.

Sərnişinlərin rahat və təhlükəsiz daşınması üçün bir sıra tədbirlər görüləcək. Xüsusilə “Gənclik”, “Nərimanov” və “28 May” stansiyalarında nəzarət mexanizmləri gücləndiriləcək. Stansiyalarda növbətçilik cədvəli əsasında əlavə işçi qüvvəsi ayrılacaq, o cümlədən sərnişinlərin yönləndirilməsi və məlumatlandırılması üçün könüllülər cəlb olunacaq.

Zərurət yaranarsa, gün ərzində ehtiyat qatarlar xəttə buraxılmaq üçün hazır vəziyyətdə saxlanılacaq.