“Çətin matç idi. İlk 30 dəqiqədə çox güclü çıxış edirdik. Buraxılan qoldan sonra bir qədər zəiflədik. Amma qələbəyə layiq idik".

Futbolmedia.az UEFA-nın saytına istinadən xəbər verir ki, bu sözləri "Çelsi"nin baş məşqçisi Tomas Tuhel UEFA Superkubokunda "Vilyarreal"a qalib gəldikləri (əsas və əlavə vaxt - 1:1, penaltilər seriyası - 6:5) matç haqqında danışarkən deyib. O, görüşün 119-cu dəqiqəsində qapıçı Eduard Mendini Kepa Arrizabalaqa ilə əvəzləməsinin səbəbini də açıqlayıb:

“Bu, kortəbii bir qərar deyildi. Bu barədə kluba gəlişimdən qısa müddət sonra qapıçılar ilə danışmışdıq. Kepanın penaltilər seriyasında ən yaxşı olduğunu göstərən statistik məlumatlarımız var. Analitiklər mənə məlumatları göstərdilər və sonra oyunçulara belə dəyişikliklərin baş verə biləcəyini söylədik. Mendinin də çıxışı fantastikdir. Amma komanda üçün ən yaxşısını etməli idik. Eduard kimi bir qapıçımızın olduğuna görə də xoşbəxtəm".